مش هرد الدهـ.ـب
أنا مش هرجع الدهب والهدايا لخطيب بنتى اللى ركنها جمبه خمس سنين وبعدين فشكل الخطوبة دي كانت الجملة اللي قلتها قدام أخو جوزي، وأنا واقفة على آخري من كتر القهر. بنتي كانت مخطوبة ومكتوب كتابها، وخطيبها كان زميلها في الجامعة.
كان بيحبها وهي بتحبه، ولما خلص جامعته جه اتقدم لها، وكتب كتابه عليها بسرعة لأنه كان ناوي يسافر. وفعلًا سافر وسافر خمس سنين كاملة. خمس سنين وبنتي مستنياه. كان بيتواصل معاها باستمرار، يطمن عليها، يكلمها بالساعات، وكل شوية يبعت لها هدية.
مرة يجيب لها حاجة مع حد نازل مصر، ومرة يحول لها فلوس تشتري اللي نفسها فيه، ولما نزل مرة جاب لها الشبكة. كانت بنتي كل ما حد يقول لها إنتِ لسه مستنياه؟ ترد وهي مبتسمة ده جوزي مستنياه يرجع ونكمل حياتنا.
وأنا كنت بشجعها وأقول لها ربنا يتمم لك على خير يا بنتي. لحد ما جه اليوم اللي قال لنا فيه أنا نازل مصر نهائي عشان أجهز الشقة ونعمل الفرح، وبعدها مراتي تسافر معايا. بنتي طارت من الفرحة. قعدنا نجهز ونخطط ونحسب المصاريف، وبدأنا نرتب للفرح.
هو كان واخد إجازة أربع شهور، وكنا فاكرين إن الأربع شهور دول هيكونوا أحلى أيام في حياتهم. لكن من أول أسبوع حاجة غريبة حصلت. الراجل اتغير. بقى عصبي. بيتعصب من أتفه سبب. لو بنتي سألته هننزل نشتري السيراميك إمتى؟
يرد بعصبية إنتِ مستعجلة على إيه؟! لو قالت له طب نحدد ميعاد الفرح؟ يقول هو أنا هتجوز غصب عني؟! في الأول قلنا يمكن السفر بهدله. يمكن ضغط الشغل. يمكن رجع متعود على حياة تانية. لكن المشاكل زادت. بقى يدور على أي سبب للخناقة.
مرة يزعل عشان اتصلت به مرتين في اليوم. ومرة يزعل عشان اتأخرت في الرد. ومرة يقول لها إنتِ اتغيرتي. فترد عليه وهي مستغربة أنا؟! أنا مستنياك خمس سنين! وكان كل ما بنتي تحاول تقرب منه، يبعد.
لحد ما في يوم رجع من عندنا وهو متخانق معاها، وقال أنا مش مرتاح للجوازة دي. أنا وقتها قلبي وقع. دخلت على بنتي لقيتها بتعيط. قلت لها حصل إيه؟ قالت مش عارفة يا ماما أنا حاسة إنه مش عايزني.
قلت لها استني، ما نستعجلش أكيد في حاجة إحنا مش فاهمينها. وفعلًا كان في حاجة إحنا مش فاهمينها. وبعد كام يوم، حد اتصل بينا وقال لنا كلام خلاني مش عارفة أصدق وداني. قال أنا مش عايز أعمل مشاكل، بس لازم تعرفوا الحقيقة. قلت حقيقة إيه؟
