كذبه العمر
التفت مصطفى لأحمد: “يلا بينا يا أحمد. يلا نرجع طنطا.”
كامل صرخ وراهم: “أحمد مش هيمشي! أحمد هيفضل هنا مع أمه وأبوه الحقيقيين، ومع العز اللي يستاهله. أحمد.. أنت هترضى ترجع لفقر الورش وشقى طنطا، وتسيب ملايين أبوك؟”
مصطفى وقف عند الباب، مألتفتش. ساب القرار لأحمد. كان حاسس إن روحه بتتسحب، لو أحمد اختار الملايين، يبقى كل اللي بناه في عشر سنين انهار.
أحمد بص لكامل، وبص لفادية، وبعدين بص لضهر مصطفى.. الضهر المحني من شقى الورش عشان يربيهم. أحمد خطى خطوة ناحية كامل، وفادية ابتسمت بالنصر. كامل طلع دفتر الشيكات: “عفارم عليك يا ابني.. أنت طلعت ذكي.”
أحمد قرب من كامل، وفجأة.. تف في وشه!
“أنت مش أبويا.. والأشكال دي متلزمنيش.” أحمد قالها بصوت مليان قرف، والتفت وجري ناحية مصطفى، مسك في دراعه جامد: “يلا بينا يا بابا.. يلا نرجع لبيتنا.”
مصطفى خد أحمد في حضنه، وبص لكامل وفادية للمرة الأخيرة: “الفلوس بتعمل كل حاجة يا كامل بيه.. بس مابتجيبش شرف، ومابتجيبش عيال.”
خرجوا من العمارة، ونزلوا على الكورنيش. أحمد كان بيبكي بحرقة، ومصطفى ماسك إيده بيشدد عليها. “أنا أسف يا بابا.. أنا أسف إني شكيت فيك، وأسف إني جبتك هنا.”
“ماتتأسفش يا ابني.. كان لازم نعرف الحقيقة عشان ندفن الماضي ونعيش الحاضر.”
ركبوا القطر وراجعين طنطا. طول السكة، مصطفى كان بيفكر في مريم ومنة والتوأم وليلى. “هنقولهم إيه؟” أحمد سأله بصوت واطي.
مصطفى أخد نفس طويل: “هنقولهم إن أمهم ماتت النهاردة.. ماتت بجد. ومفيش داعي يعرفوا القذارة دي. سيبهم فاكرينها الست الطيبة اللي في الجنة، عشان يفضلوا نضاف من جوة.”
وصلوا الشقة بالليل. أول ما فتحوا الباب، لقوا العيال كلهم صاحيين، قاعدين في الصالة ومستنيين. مريم وقفت بسرعة: “عملتوا إيه يا بابا؟ شوفتوها؟”
ليلى قربت وعينيها مليانة رجاء: “هي عايشة يا بابا؟ هتيجي تاخدنا؟”
مصطفى بص لأحمد، وأحمد هز راسه بأسى. مصطفى قعد على الكنبة، وخد ليلى في حضنه، وجمع العيال كلهم حواليه: “يا أولاد.. أحمد اتهيأله. الشبه بيخلق من الشبه أربعين زي ما قولتلكوا. الست اللي في الفيديو طلعت واحدة تانية خالص، وأمكم.. أمكم في الجنة، وشايفاكم دلوقتي.”
العيال كلهم عيطوا، بس المرة دي كانت دموع راحة، دموع نهاية الشك. مريم بصت في عين مصطفى، وعرفت من نظرته إن فيه سر كبير ومخيف اتدفن، بس احترمت صمته وقربت باست إيده: “الحمد لله يا بابا.. ربنا يخليك لينا.”
