أخر فرصه

الجزء الاول — بطل هزار فارغ بقى… إنتي من غيري ولا حاجة. قالها حسام وهو خارج من باب الشقة بعصبية، وساب الباب يخبط وراه جامد. وبعدها ندم… بس بعد ما الوقت فات. بقلم منــال عـلـي — بصي يا ندى، أنا كنت بتكلم مع كريم… ندى حطت الكاتل على البوتاجاز، وحست بحاجة تقيلة جواها. حسام كان قاعد على السفرة، بيلعب بالشوكة في طبق البيض ومش قادر يبصلها في عينها. الحركة دي كانت حافظاها عنه كويس أوي… بيعملها دايمًا قبل ما يفتح موضوع عارف إنها هتضايق منه. — وماله كريم؟ قالتها وهي بتطلع الكوبايات من الدولاب. — فيه فرصة حلوة أوي. محل تلميع عربيات وديتيلينج في مدينة نصر، المكان لقطه، والزباين عليه كتير. غسيل جاف، بوليش، نانو سيراميك… شغل بيكسب دهب اليومين دول. ندى بصتله. أخيرًا رفع عينه فيها، بنفس النظرة اللي بقت تحفظها بعد عشر سنين جواز… حماس مستخبي ورا برود مستفز. — يعني عايز يشغلك معاه؟ — لا يا ندى… ندخل معاه شركا. — شركا؟ يا حسام، إحنا أصلًا معندناش فلوس سايبة. — لا عندنا. من تلات أسابيع بس كانوا قاعدين على نفس السفرة بيتكلموا هيصرفوا فلوس بيع البيت الصغير اللي ورثته من خالتها أمينة. البيت كان في قرية بعيدة في الشرقية، مهدود ومحدش بيروحله. باعوه بـ٩٠٠ ألف جنيه، والمبلغ بالنسبالهم كان عمر كامل. — كريم بيقول المحل ده لو اتساب هيروح مننا، قالها حسام بسرعة. — لازم نلحق ندخل. — والفلوس دي هنجيبها منين؟ هنا بدأ يدخل في الجد. — ما هي موجودة. نحطها دلوقتي وبعدها ترجع أضعاف. وكمان نجيبلك عربية أحسن. ندى صبت الشاي وقعدت قصاده متوفره على روايات واقتباسات — إحنا اتفقنا يا حسام… أنا بدأت فعلًا كورس السواقة، وهقدم على الامتحان قريب. — وإيه العلاقة؟ أنا بتكلم في مستقبلنا. — أيوه، مستقبلنا إنك تاخد فلوس البيت اللي ورثته وأحطها في مشروع مع كريم. — مش “فلوس بيتك”، دي فلوسنا إحنا. إحنا عيلة. ندى سكتت. لما البيت كان واقع ومحدش طايقه، عمر حسام ما قال نروح ننضفه ولا حتى نشوفه. أول ما اتباع بقى “بتاعنا”. — كريم ومراته هبة جايين السبت، قالها وهو بيقوم يحط الطبق في الحوض. — نقعد كلنا ونتكلم بالعقل بدل العند ده. في اللحظة دي خرج يوسف من أوضته، شنطته على كتفه. بقلم منــال عـلـي — يلا يا ماما، هتأخر على التمرين. — يلا يا حبيبي. ندى قامت وسابت الشاي مكانه. — الكلام خلص يا حسام. — لا مخلصش، زعق وراها. — هنتكلم السبت. السبت بدأ عادي جدًا. كريم جاب جاتوه من محل مشهور في مصر الجديدة، وهبة جابت عصير ومكسرات. في الأول الكلام كان هزار عادي: المدارس، الأسعار، البنزين، المصيف اللي محدش عارف يروحه من الغلا. بعد شوية كريم دخل في الموضوع مباشرة. — حسام قالك على مشروع الديتيلينج؟ — قال بشكل عام. — يا ندى دي فرصة متتعوضش، قالها كريم وهو متحمس. — المكان جامد جدًا، والزباين بالعبيط. فاكرة وائل؟ اللي كان فاتح قبله؟ الراجل اشترى عربية في سنتين. ندى رفعت حاجبها. — عربية بس؟ — ما هو كان شغال لوحده. إحنا بقى هنكبر الدنيا. هبة دخلت في الكلام بسرعة: — بصراحة يا ندى، أنا كمان كنت خايفة في الأول. بس لو فضلنا خايفين هنفضل طول عمرنا بنقبض ونصرف وخلاص. ندى بصتلهم كلهم وفهمت فجأة. دي مش قعدة صحاب. دي جلسة إقناع متحضّر لها من زمان. حسام كان متفق معاهم قبلها، وجايبهم علشان يبقوا صف واحد عليها. اتنين ضد واحدة. — طيب محتاجين كام؟ سألت بهدوء. — حوالي ٧٠٠ ألف، رد كريم. — إنتوا ٤٠٠ وإحنا ٣٠٠. — وإنتوا أقل ليه؟ — أصل الفكرة مني وأنا اللي دورت ورتبت. — وإحنا معانا المبلغ، قالها حسام بسرعة قبل ما حد يرد. ندى بصتله ببرود. بقلم منــال عـلـي — لا، إحنا لسه مقررنّاش حاجة. — هنقرر يعني، قال حسام وهو بيضحك بتوتر. — صب يا كريم كوباية كمان وكل حاجة تتحل. فضلوا يتكلموا في أي حاجة وخلاص. هبة تحكي عن رحلة الغردقة، وكريم يحكي مواقف من الورشة، وندى تبتسم بالمجاملة وهي مستنية الليلة تخلص. بعد ما الضيوف مشيوا، ويوسف نام، فضلوا هما الاتنين في المطبخ. هي بتغسل الكوبايات، وهو بينشفهم. — ها؟ قولتي إيه؟ سألها حسام. — مش هحط الفلوس في المشروع. — يا ندى متقفليش دماغك. ده شغل مضمون. بعد كام شهر الفلوس كلها ترجع. — وبعد كام شهر أجيب العربية؟ وبعد كام شهر أرتاح من المواصلات أنا وابني؟ — بعدين يا ندى… كله هيبقى أحسن. — أنا تعبت من “بعدين”. قالتها وهي باصة للحوض. — أنا عندي خطة واضحة: أطلع الرخصة، أجيب عربية، وأعيش مرتاحة شوية بدل البهدلة اليومية. إنما إنت كل كلامك “بعدها”، “هنشوف”، “هتكسب”. دي مش خطط… دي وعود. حسام شبك إيده وبصلها باستهزاء خفيف. — إنتِ عمرك ما صدقتيني. بقلم منــال عـلـي الأيام اللي بعدها كان متغير. ردوده مختصرة، قاعد طول الوقت على الموبايل، ووشه مكشر. ندى كانت عارفة اللعبة دي… مستنيها هي اللي تروح تصالحه وتلين دماغها. بس المرة دي معملتش كده. تالت يوم رجع فتح الموضوع من غير مقدمات. — إنتِ عارفة أنا بعمل قد إيه علشان البيت؟ وإنتِ واقفة قصادي. — يا حسام، لو نفسك تبقى رجل أعمال خد قرض واعمل اللي إنت عايزه… إشمعنى فلوسي أنا؟ يتبع…

مقالات ذات صلة

زين

سر الميراث

رجعت من عند اهلي

قدري المر

رحيم ورحمه

بقلم مني السيد

اترك تعليقاً إلغاء الرد